"તુષાર શુક્લ"

કોકિલનો ટહુકો ગમે છે મને સાહ્યબા ,તો હોલાના ઘૂઘવાટે ગમવાનું નહિ ?
ગામ તણી શેરી મને ગમતી હો વ્હાલમાં, તો પાદરની કેડીએ ભમવાનું નહિ ?
રસિયા, શાને રિસાઈ જાતો, વાત કહું તે માન,
ગમતાને અણગમતું કહેવું,
તારું છે અપમાન.
તારું ગમવું આંખમાં આંજ્યું થયું ત્યારથી જાદુ,
જ્યાં જાઉં ત્યાં મનનું ગમતું નજર પડે એકાદું.
દોડવા ને કૂદવાનું આવડ્યું તો સાહ્યબા , કોડી ને પાંચીકે રમવાનું નહિ ?
ગમતું શોધી કાઢવાની જ્યાં ટેવ આ મનને પડી,
હવે કશું એ અણગમતું નાં આંખને મારી જડે.
તું ગમતો તો સઘળું ગમતું, મનગમતો મળ્યો તું,
દર્પણમાં જોઇને મુજને ગમવા લાગી હું !
ચૂડી ને ચૂંદડી મેં પહેરી તો સાહ્યબા , ઝાંઝરના ઝમકારે છમછમવાનું નહિ ?